Signal Desktop ကိုဆက်လက်အသုံးပြုရန် သင့်ပင်မစက်ကို ပြန်လည်ချိတ်ဆက်ပါ

စက်တင်ဘာ 19 ရက် 2023 တွင် ကျွန်ုပ်တို့သည် PQXDH - Signal Protocol အတွက် ကွမ်တမ်ခုခံမှုကို မြှင့်တင်ရန် ပထမအဆင့်ကို ကြေညာခဲ့သည်။ Signal သည် ဤအဆင့်ကိုလုပ်ဆောင်သည့် ပထမဆုံး ခေတ်ရေစီးကြောင်းပေါ်ရှိ မက်ဆေ့ချ်ပေးပို့ရေးအက်ပ်ဖြစ်သည် — လက်ရှိ ကုဒ်ပြောင်းဝှက်ခြင်းစံနှုန်းများကို ချိုးဖျက်နိုင်လောက်အောင် အစွမ်းထက်သော အနာဂတ်ကွမ်တမ်ကွန်ပျူတာ၏ ခြိမ်းခြောက်မှုကို ကာကွယ်သည့် အရေးကြီးသော အလွှာတစ်ခု ထပ်ထည့်ထားသည်။

PQXDH ပံ့ပိုးမှုကို Signal တွင် ထည့်သွင်းခဲ့သည်မှာ တစ်နှစ်ခွဲကျော်ရှိပြီဖြစ်သည်။ ဤမွမ်းမံမှုများကို လူတိုင်းအကျိုးခံစားရစေရန်အတွက် Signal ဝန်ဆောင်မှုကို ဆက်လက်အသုံးပြုရာတွင် PQXDH ပံ့ပိုးကူညီမှုကို မကြာမီ စတင်လိုအပ်လာမည်ဖြစ်သည်။

Signal Desktop တွင် ဤနဖူးစည်းကို အဘယ်ကြောင့်တွေ့ရသနည်း။

သင့်အကောင့်သည် ရှားပါးအမျိုးအစားတစ်ခုထဲသို့ ရောက်နေသည်-

• သင့်အကောင့်၏ ပင်မစက် (Signal တွင် မူလအစက စာရင်းသွင်းရန် သင်အသုံးပြုခဲ့သည့် Android သို့မဟုတ် iOS စက်) ကို အပ်ဒိတ်လုပ်ထားခြင်းမရှိသလို Signal ဝန်ဆောင်မှုနှင့် ချိတ်ဆက်ခြင်းမရှိသည်မှာလည်း တစ်နှစ်ကျော်ကြာပြီဖြစ်သည်။
• သင့်လင့်ခ်ချိတ်ထားသော စက်တစ်ခုသို့မဟုတ် စက်များ (ဥပမာ Signal Desktop) သည် Signal ကို အသုံးပြုနေပြီး ဝန်ဆောင်မှုသို့ ချိတ်ဆက်နေပါသည်။
• သင့်အကောင့်၏ ပင်မစက်သည် PQXDH ကို မပံ့ပိုးပါ။

ဘာလုပ်ရမည်နည်း။

ပုံမှန်အခြေအနေများတွင် လုပ်ငန်းစဉ်သည် ရိုးရှင်းပြီး လွယ်ကူပါသည်-

1. Signal ကို သင်မူလအစက စာရင်းသွင်းခဲ့သည့် ဖုန်းကို ရှာပါ။
2. ဖုန်းကိုဖွင့်ပြီး နောက်ဆုံးထွက် Signal အပ်ဒိတ်ကို ထည့်သွင်းပါ (ဥပမာ- App Store သို့မဟုတ် Play Store မှ)။ Signal ထုတ်ဝေမှုသည် ရက် 90 အကြာတွင် သက်တမ်းကုန်ဆုံးမည်ဖြစ်သဖြင့် အံဆွဲထဲတွင် ထည့်ထားသည့်ဖုန်းကိုအားသွင်းပြီး Signal ဗားရှင်းအဟောင်းကိုဖွင့်ရန် ချက်ချင်းကြိုးစားခြင်းသည် အလုပ်မဖြစ်ပါ။
3. ထိုဖုန်းတွင် နောက်ဆုံးထွက် Signal အပ်ဒိတ်ကို ဖွင့်ပြီး ဝန်ဆောင်မှုသို့ ချိတ်ဆက်ခွင့်ပြုပါ။ မတူညီသော ချက်(တ်)တွဲများတွင် အမှားအယွင်းများစွာတွေ့နိုင်သည်ကို သတိပြုပါ။ သင့်ပင်မစက်သည် Signal ဝန်ဆောင်မှုမှ အချိန်အတော်ကြာအောင် ချိတ်ဆက်မှု ပြတ်တောက်သွားခဲ့ပြီး လွတ်သွားသည့်အရာအားလုံးကို ချောမွေ့စွာ ပြန်လည်ရနိုင်မည်မဟုတ်ပေ။
4. Signal ကို ဖုန်းတွင် မိနစ်အနည်းငယ်ကြာ ဖွင့်ထားပါ။
5. Signal Desktop ကို ပိတ်ပြီး ပြန်ဖွင့်ပါ။ သင့်ဖုန်းသည် ဝန်ဆောင်မှုကို အပ်ဒိတ်လုပ်ပြီး အောင်မြင်စွာ ချိတ်ဆက်နိုင်ခဲ့ပါက နဖူးစည်းကို သင်မြင်ရတော့မည်မဟုတ်ပါ။

ဒါကို မလုပ်လျှင် သို့မဟုတ် ထိုဖုန်းသို့ ဝင်သုံးခွင့်မရှိတော့လျှင် သို့မဟုတ် မူလပင်မစက်တွင် Signal ကို ဖြုတ်လိုက်လျှင် မည်သို့ဖြစ်မည်နည်း။

သင့်အကောင့်ကို ပိတ်လိုက်မည်ဖြစ်ပြီး သင်သည် အပလီကေးရှင်း၏ နောက်ဆုံးပေါ်ဗားရှင်းကို အသုံးပြု၍ Signal ကို ပြန်လည်ထည့်သွင်းပြီး မှတ်ပုံတင်ရန် လိုအပ်မည်ဖြစ်သည်။

ဤသို့ထပ်မဖြစ်ရန် ဘာလုပ်နိုင်သနည်း။

ကျေးဇူးပြု၍ သင့်ဖုန်းတွင် Signal ကို အခါအားလျော်စွာ ဖွင့်ပြီး အပ်ဒိတ်ဖြစ်နေပါစေ။ သင့်အကောင့်ရှိသည့် စက်တိုင်းသည် နောက်ဆုံးထွက်မွမ်းမံမှုများနှင့် မြှင့်တင်မှုများကို ပံ့ပိုးပေးမှသာ အချို့သောအင်္ဂါရပ်များကို ဖွင့်နိုင်မည်ဖြစ်ပြီး မူလစက်ကိုမသုံးသည့်အခါ မဖွင့်နိုင်ပါ။

၎င်းကို အဘယ်ကြောင့် ကျွန်ုပ်၏ ပင်မစက်/ဖုန်းမှ လုပ်ဆောင်ရန်လိုအပ်သနည်း။

သင်၏ Signal အကောင့်သည် PQXDH ကို ပံ့ပိုးရန်အတွက် သင့်အကောင့်နှင့် ချိတ်ဆက်ထားသော စက်တစ်ခုချင်းစီတိုင်းသည် PQXDH ကို ပံ့ပိုးပေးရမည်ဖြစ်သည်။ Signal အကောင့်တိုင်းတွင် ပင်မစက်တစ်ခုရှိရမည်။ သင်၏ အဓိကစက်ပစ္စည်းသည် သင့် Signal အကောင့်နှင့် အမြဲဆက်စပ်နေပြီး ၎င်းကို ပုံမှန်အသုံးမပြုလျှင်ပင် သင့်အကောင့်မှ ဖယ်ရှား၍မရပါ။ Signal အကောင့်တစ်ခုနှင့် ချိတ်ဆက်ထားသော စက်ပစ္စည်းတိုင်းတွင် ၎င်း၏ကိုယ်ပိုင် ကုဒ်ပြောင်းဝှက်ကီးများပါရှိပြီး စက်တစ်ခုသည် အခြားစက်အတွက် ကုဒ်ဝှက်ကီးအသစ်များကို မထုတ်လုပ်နိုင်ပါ။ သင်၏ပင်မစက်ကို သင့်အကောင့်မှ မဖယ်ရှားနိုင်သောကြောင့် PQXDH ကုဒ်ဝှက်ကီးများကို ထုတ်လုပ်နိုင်စေရန်အပြင် သင့်အကောင့်နှင့်ဆက်စပ်နေသော အခြားစက်များသည် PQXDH ပံ့ပိုးပေးထားသည့် ကာကွယ်မှုမှ အကျိုးခံစားနိုင်စေရန် သင်၏ပင်မစက်ကို ပြန်လည်အသက်သွင်းရပါမည်။

၎င်းသည် အဘယ်ကြောင့်အရေးပါသနည်း။

နောက်ဆုံးပေါ် အင်္ဂါရပ်များနှင့် မြှင့်တင်မှုများတွင် နောက်ကျကျန်နေခြင်းသည် သင်ပြောမည့်လူတိုင်းအပေါ်လည်း သက်ရောက်မှုရှိပါသည်။ သင့်အကောင့်သည် လောလောဆယ်တွင် PQXDH ကို မပံ့ပိုးနိုင်သောကြောင့် ၎င်းတို့၏အကောင့်များနှင့် စက်များသည် အပ်ဒိတ်ဖြစ်နေသော်လည်း အပ်ဒိတ်လုပ်ထားသော ပရိုတိုကောကို အသုံးပြု၍ အခြားမည်သူမျှ သင်နှင့် မက်ဆေ့ချ်များ ဖလှယ်နိုင်မည်မဟုတ်ပါ။

အခြားအက်ပ်အများစုတွင် မစတင်ရသေးသည့်အရာဖြစ်သော်လည်း Signal သည် အနာဂတ် ကွမ်တမ်ကွန်ပျူတာ၏ခြိမ်းခြောက်မှုကို ခုခံကာကွယ်ရန် ချဉ်းကပ်မှုအသစ်များကို ထည့်သွင်းရာတွင် ဦးဆောင်လမ်းပြလျက်ရှိသည်။ PQXDH ပံ့ပိုးမှုကို အားပေးခြင်းသည် မည်သည့် လမ်းစဉ်ကိုမျှ နောက်ပြန်မဆုတ်စေသော နည်းလမ်းများဖြင့် ဤကြိုးပမ်းအားထုတ်မှုများကို ဆက်လက်တည်ဆောက်နိုင်စေပြီး သင်ဂရုစိုက်သောလူများကို အကာအကွယ်ပေးရန် ကူညီပေးနိုင်ပါသည်။

နားလည်မှုအတွက် ကျေးဇူးတင်ပြီး အဆင်မပြေမှုတစ်စုံတစ်ရာအတွက် တောင်းပန်အပ်ပါသည်။