Signal သည် သင့်ဖုန်းနံပါတ်ကို Signal တွင် သင် ချက်(တ်)သောသူများ မမြင်တွေ့ရအောင် လျှို့ဝှက်နိုင်စေရန် ပြုလုပ်ပေးထားပါသည်။ ဤနေရာတွင် ဖုန်းနံပါတ် ကိုယ်ပိုင်အချက်အလက် ဆက်တင်များအကြောင်း၊ သင့်ဖုန်းနံပါတ်ကို မမျှဝေဘဲ ချိတ်ဆက်နိုင်ရန် နည်းတစ်နည်းအဖြစ် သုံးစွဲသူအမည်များကို မည်သို့အသုံးပြုနိုင်ကြောင်းတို့အပြင် Signal တွင် သင် ချက်(တ်)သောသူများအား စိစစ်အတည်ပြုရန် နည်းလမ်းများအကြောင်းကိုလည်း ဆွေးနွေးသွားမည်ဖြစ်ပါသည်။
ဖုန်းနံပါတ် ကိုယ်ပိုင်အချက်အလက် ဆက်တင်များ
သင့်အနေဖြင့် Signal ဗားရှင်း 7.0 နှင့်အထက်ကို အသုံးပြုနေပါက ဆက်တင် > ကိုယ်ပိုင်အချက်အလက် > ဖုန်းနံပါတ်သို့ သွားပါ။
မူလအားဖြင့် သင့်ဖုန်းနံပါတ် ကိုယ်ပိုင်အချက်အလက် ဆက်တင်သည် ဤသို့ရှိပါမည်-
လူအများအနေဖြင့် သင့်ဖုန်းနံပါတ်ကို သိထားပြီးဖြစ်ပါက Signal တွင် သင့်ဖုန်းနံပါတ်ကို ရှာဖွေခြင်းဖြင့် သင့်ကို ရှာတွေ့နိုင်ပါမည်။ သို့သော် သင့်ဖုန်းနံပါတ်ကို သူတို့၏ ဖုန်းအဆက်အသွယ်များထဲတွင် သိမ်းထားပြီးမဟုတ်ပါက သင့်ဖုန်းနံပါတ်ကို သင့်ပရိုဖိုင်း အသေးစိတ်အချက်များထဲတွင် မြင်တွေ့ရမည်မဟုတ်ပါ။
ကျွန်ုပ်၏ ဖုန်းနံပါတ်ကို မြင်နိုင်သူများ
Signal တွင် သင်၏ ပရိုဖိုင်းအသေးစိတ်အချက်များ စာမျက်နှာ၌ သင့်ဖုန်းနံပါတ်ကို မြင်တွေ့ရခြင်း ရှိ၊ မရှိ ဤဆက်တင်က ဆုံးဖြတ်ပေးပါသည်။
"ကျွန်ုပ်၏ ဖုန်းနံပါတ်ကို မြင်နိုင်သူများ" ကို "မည်သူမဆို" ဟု ပြောင်းလိုက်ပါက Signal တွင် သင်နှင့် ချက်(တ်)နေသူများအနေဖြင့် သင်၏ ပရိုဖိုင်းအသေးစိတ်အချက်များ စာမျက်နှာ၌ သင့်ဖုန်းနံပါတ်ကို မြင်တွေ့ရပါမည်။
ကျွန်ုပ်တို့၏ ဘလော့ဂ်သို့ သွားခြင်းဖြင့် ထိုဆက်တင်များကို ဗီဒီယိုဖြင့် ကြည့်လိုက်ပါ။
"မည်သူမျှမမြင်တွေ့နိုင်ပါ" ကို ရွေးလိုက်ပါက Signal တွင် သင်နှင့် ချက်(တ်)နေသူများအနေဖြင့် သင့်ဖုန်းနံပါတ်ကို သူတို့၏ ဖုန်းအဆက်အသွယ်များထဲတွင် သိမ်းထားပြီးမဟုတ်လျှင် သင့်ဖုန်းနံပါတ်ကို သင့်ပရိုဖိုင်း အသေးစိတ်အချက်များထဲတွင် မြင်တွေ့ရမည်မဟုတ်ပါ။ ၎င်းသည် မူလဆက်တင် ဖြစ်ပါသည်။
သင့်ဖုန်းနံပါတ်ကို ဖုန်းအဆက်အသွယ်များထဲတွင် သိမ်းထားသည်ဖြစ်စေ မသိမ်းထားသည်ဖြစ်စေ ၎င်းကို မည်သူမျှ မမြင်တွေ့စေလိုပါက "ကျွန်ုပ်ကို ဖုန်းနံပါတ်ဖြင့် ရှာနိုင်သူများ" အား "မည်သူမျှမရှာနိုင်ပါ" ဟု ပြောင်းထားနိုင်ပါသည်။ ၎င်းသည် သင့်ဖုန်းနံပါတ်ကို လူတိုင်းမမြင်နိုင်စေရန် ဖျောက်ထားပေးပါမည်။ သို့သော် ၎င်းသည် Signal သုံးရာတွင် များစွာပို၍ခက်ခဲသွားစေပါမည်၊ သင့်ဘဝတွင် ပါဝင်ပတ်သက်နေသူများအနေဖြင့် သင့်ကို Signal တွင် ဆက်သွယ်နိုင်ကြောင်း သိရှိရန် ပိုခက်သွားစေခြင်းကြောင့်လည်း ပါပါသည်။
ကျွန်ုပ်၏ဖုန်းနံပါတ်ဖြင့် ကျွန်ုပ်ကို ရှာနိုင်သူများ
သင့်ဖုန်းနံပါတ်ကို သိထားသူ တစ်စုံတစ်ဦးက Signal တွင် ရိုက်ထည့်ပြီး သင် Signal သုံးနေကြောင်း တွေ့ရှိကာ သင့်ထံသို့ မက်ဆေ့ချ်ပို့ခြင်း ပြုလုပ်၍ ရ၊ မရ ဤဆက်တင်က သင့်ကို ဆုံးဖြတ်ခွင့်ပေးပါသည်။
မူလသတ်မှတ်ချက်အားဖြင့် "ကျွန်ုပ်၏ဖုန်းနံပါတ်ဖြင့် ကျွန်ုပ်ကို ရှာနိုင်သူများ" ကို "လူတိုင်း" ဟု ပြောင်းထားပါမည်၊ သင့်ဖုန်းနံပါတ်ကို ရထားသူတိုင်းသည် သင့်ကို ဖုန်းနံပါတ်ဖြင့် ရှာနိုင်သည့်သဘော ဖြစ်ပါသည်။ ဤသည်မှာ နှစ်များစွာကြာအောင် Signal အလုပ်လုပ်လာခဲ့သည့်ပုံစံ ဖြစ်ပါသည်။ လူအများအဖို့ ၎င်းတို့ ချက်(တ်)နိုင်သူများကို အလွယ်တကူမြင်တွေ့ခွင့်ပေးခြင်းသည် ဟိုဘက်သည်ဘက် ကုဒ်ပြောင်းဝှက်ပြီး မက်ဆေ့ချ်ပို့ခြင်းကို လူသန်းပေါင်းများစွာအတွက် အသုံးပြုရလွယ်ကူအောင် Signal က လုပ်ပေးထားသည့် နည်းလမ်းများထဲမှ တစ်ခုဖြစ်ပါသည်။
"ကျွန်ုပ်၏ဖုန်းနံပါတ်ဖြင့် ကျွန်ုပ်ကို ရှာနိုင်သူများ" ကို "လူတိုင်း" ဟု ပြောင်းထားပါက သင့်နံပါတ်ကို သိထားသူတိုင်းသည် ချက်(တ်)အသစ် မျက်နှာပြင်တွင် ရိုက်ထည့်ပြီးနောက် သင့်ထံ မက်ဆေ့ချ်ပို့ရန် တောင်းဆိုမှု ပေးပို့နိုင်ပါမည်၊ ၎င်းကို သင်က လက်ခံခြင်း၊ ဖျက်ခြင်း သို့မဟုတ် ဘလော့ခ်ခြင်း ပြုလုပ်နိုင်ပါမည်။
ကျွန်ုပ်တို့၏ ဘလော့ဂ်သို့ သွားခြင်းဖြင့် ထိုဆက်တင်များကို ဗီဒီယိုဖြင့် ကြည့်လိုက်ပါ။
မူလသတ်မှတ်ချက်ကို ပြောင်းပြီးနောက် "မည်သူမျှမရှာနိုင်ပါ" ဟု သတ်မှတ်ထားပါက မက်ဆေ့ချ်အသစ် မျက်နှာပြင်တွင် သင့်ဖုန်းနံပါတ်ကို ရိုက်ထည့်သူသည် သင့်ဖုန်းနံပါတ်သည် Signal အကောင့်တစ်ခုခုနှင့် ဆက်စပ်မှုမရှိကြောင်း စာကို မြင်တွေ့ရပါမည်။ သင့်ဖုန်းနံပါတ်ကို ဖုန်းအဆက်အသွယ်ထဲတွင် ထည့်သွင်းထားလျှင်ပင် ထိုမျက်နှာပြင်ကို ၎င်းတို့ မြင်တွေ့နေရပါမည်။
"ကျွန်ုပ်၏ဖုန်းနံပါတ်ဖြင့် ကျွန်ုပ်ကို ရှာနိုင်သူများ" ကို "မည်သူမျှမရှာနိုင်ပါ" ဟု သတ်မှတ်ထားပါက တစ်စုံတစ်ဦးအနေဖြင့် သင့်ကို Signal တွင် ချိတ်ဆက်နိုင်ရန် သင်၏ အများနှင့်မတူသော သုံးစွဲသူအမည် အတိအကျကို သိရှိရန် လိုအပ်ပါမည်။ သို့ဆိုလျှင် သင့်ဘဝတွင် ပါဝင်ပတ်သက်နေသူများအနေဖြင့် သင့်ကို Signal တွင် မက်ဆေ့ချ်ပို့နိုင်ကြောင်း သိရှိရန် ပိုခက်သွားပါမည်။
ထိုဖုန်းနံပါတ် ကိုယ်ပိုင်အချက်အလက် ဆက်တင်များသည် အကုန်ဖွင့်လျှင်ဖွင့်၊ မဟုတ်လျှင် အကုန်ပိတ်ရမည့် ဆက်တင်များဖြစ်ပါသည်။ သင့်ဖုန်းနံပါတ်ကို အချို့လူများ သို့မဟုတ် အဖွဲ့များကိုသာ ပြသပြီး လူတိုင်းကို မပြဘဲထားရန် ရွေး၍မရပါ။
ထိုဆက်တင်ကို သင် အချိန်မရွေး ပြောင်းနိုင်ပါသည်။
သုံးစွဲသူအမည်များ
သုံးစွဲသူအမည်သည် သင့်ဖုန်းနံပါတ်ကို မမျှဝေဘဲ Signal တွင် စတင်ဆက်သွယ်ရန် နည်းတစ်နည်း ဖြစ်ပါသည်။
Signal ရှိ သုံးစွဲသူအမည်များသည် လူမှုကွန်ရက်မီဒီယာ ပလက်ဖောင်းများရှိ သုံးစွဲသူအမည်များကဲ့သို့ အလုပ်မလုပ်ပါ။
သုံးစွဲသူအမည်သည် ချက်(တ်)များတွင် ပြသသော ပရိုဖိုင်း အမည် မဟုတ်ပါ၊ ၎င်းသည် အမြဲတမ်းသတ်မှတ်ချက် မဟုတ်ပါ၊ Signal တွင် သင် ချက်(တ်)နေသူတိုင်းလည်း ၎င်းကို မြင်တွေ့ရမည်မဟုတ်ပါ။
Signal တွင် အခြားသူများနှင့် ချက်(တ်)စတင်ရန် သုံးစွဲသူအမည်ကိုသာ သုံးလိုလျှင်ပင် အက်ပ်တွင် သင် အကောင့်ဖွင့်ရန် ဖုန်းနံပါတ် လိုအပ်နေပါဦးမည်။
သုံးစွဲသူအမည် ဖန်တီးခြင်း
သုံးစွဲသူအမည်တစ်ခု ဖန်တီးရန် ဆက်တင် ပရိုဖိုင်းသို့သွားပြီး သင် သုံးလိုသော သုံးစွဲသူအမည်ကို ရိုက်ထည့်ပါ။
သုံးစွဲသူအမည် သတ်မှတ်ခြင်းမှာ သင့်ဆန္ဒအလျောက်သာ ဖြစ်ပါသည်၊ မဖြစ်မနေ ဖန်တီးသတ်မှတ်ရန် မလိုပါ။ "ကျွန်ုပ်၏ဖုန်းနံပါတ်ဖြင့် ကျွန်ုပ်ကို ရှာနိုင်သူများ" ကို မူလသတ်မှတ်ချက်ဖြစ်သည့် "လူတိုင်း" ဟု သတ်မှတ်ထားပါက သင် ချိတ်ဆက်လိုသောသူများနှင့် ဖုန်းနံပါတ် သို့မဟုတ် သုံးစွဲသူအမည် တစ်ခုခုကို မျှဝေပေးရန် ရွေးချယ်နိုင်ပါသည်။
ပရိုဖိုင်း အမည်နှင့်မတူဘဲ သင်၏ သုံးစွဲသူအမည်သည် အများနှင့်မတူ ထူးခြားရပါမည်။ သုံးစွဲသူအမည်တိုင်းတွင် နောက်ဆုံး၌ ဂဏန်းအနည်းဆုံး 2 လုံး ပါဝင်ပါသည်။ ထိုနံပါတ်များကို သင် ရွေးချယ်လိုပါက ရွေးနိုင်ပါသည်။
သင့်သုံးစွဲသူအမည်ကို ဖန်တီးပြီးပါက နည်းလမ်း 3 မျိုးဖြင့် မျှဝေနိုင်ပါသည်။ တစ်စုံတစ်ဦးကို သင့်သုံးစွဲသူအမည် ပြောပြနိုင်သည်၊ သင်၏ QR ကုဒ် မျှဝေပေးနိုင်သည် သို့မဟုတ် အများနှင့်မတူသော URL ကို မျှဝေပေးနိုင်သည်။ URL တွင် သင့်သုံးစွဲသူအမည်မှ စာလုံးများ မပါဝင်ပါ။
Signal အကောင့်တစ်ခု၏ ဖုန်းနံပါတ် ပေးလိုက်ပါက Signal သည် ၎င်းနှင့်ဆက်စပ်သော သုံးစွဲသူအမည်ကို အလွယ်တကူတွေ့မြင်နိုင်ခြင်း သို့မဟုတ် ထုတ်ပေးနိုင်ခြင်း မရှိပါ။
သုံးစွဲသူအမည်တစ်ခု၏ ရိုးရိုးစာသားကို ပေးလိုက်ပါက Signal သည် ထိုသုံးစွဲသူအမည်ကို လက်ရှိတွင် ၎င်းနှင့် ဆက်စပ်နေသည့် Signal အကောင့်နှင့် ချိတ်ဆက်ပေးနိုင်ပါသည်။ သို့သော် သုံးစွဲသူအမည်တစ်ခုကို ပြောင်းပြီးပြီးချင်း သို့မဟုတ် ဖျက်ပြီးပြီးချင်းတွင် ၎င်းသည် Signal အကောင့်တစ်ခုနှင့် ဆက်စပ်မှုရှိတော့မည်မဟုတ်ပါ။
သုံးစွဲသူအမည် ပြောင်းခြင်း
သုံးစွဲသူအမည်များကို ပြောင်းလွယ်ပြင်လွယ်ရန် စီမံထားပါသည်။ အမည်တစ်ခုတည်းကို ထားချင်သလောက် ကြာကြာထားနိုင်ပါသည် သို့မဟုတ် ပြောင်းချင်သလောက်လည်း ခဏခဏပြောင်းနိုင်ပါသည်။
သင့်အနေဖြင့် တစ်ကြိမ်လျှင် သုံးစွဲသူအမည်တစ်ခုသာ ထားနိုင်ပါသည်။
သင့်သုံးစွဲသူအမည်ကို ပြောင်းလိုက်ပါက သင် အပြောင်းအလဲလုပ်ပြီး တစ်ပတ်ခန့်အတွင်း အခြားမည်သူကမျှ သင့်သုံးစွဲသူအမည်အဟောင်းကို ရယူနိုင်မည်မဟုတ်ပါ။ ထို့နောက်ပိုင်းတွင် ထိုအမည်ကို ၎င်းတို့ ရယူနိုင်ပါမည်။
သင့်သုံးစွဲသူအမည်ကို ပြောင်းလဲခြင်းမပြုဘဲ QR ကုဒ်နှင့် URL ကို ပြောင်းနိုင်ပါသည်။
သင့်ပရိုဖိုင်း အမည်ကို ပြောင်းခြင်းနှင့် မတူဘဲ သုံးစွဲသူအမည်တစ်ခုကို ဖန်တီး၊ ပြောင်းလဲ သို့မဟုတ် ဖျက်ပစ်သောအခါ သင့်အဆက်အသွယ်များနှင့် အဖွဲ့များထံ အကြောင်းကြားမည်မဟုတ်ပါ။ သုံးစွဲသူအမည်တစ်ခုကို ပြောင်းလဲခြင်း သို့မဟုတ် ဖျက်ပစ်ခြင်းသည် ယခင်သုံးစွဲသူအမည်ဖြင့် သင် ချိတ်ဆက်ထားသည့်သူများနှင့် ချက်(တ်)များအပေါ် သက်ရောက်မှုမရှိပါ။
သင့်ဖုန်းနံပါတ်ကို ပြောင်းလိုက်လျှင် သုံးစွဲသူအမည်ပြောင်းရန် သင့်ကို အတင်းအကျပ်တွန်းအားပေးမည် မဟုတ်ပါ။
သုံးစွဲသူအမည်ဖြင့် ချိတ်ဆက်ခြင်း
သုံးစွဲသူအမည်တစ်ခုမှတစ်ဆင့် ချက်(တ်)စတင်ရန် နံပါတ်များပါဝင်သော သုံးစွဲသူအမည်အတိအကျကို ချက်(တ်)အသစ် မျက်နှာပြင်တွင် ရိုက်ထည့်ပါ။
| သင့်ဖုန်း | တစ်ဖက်လူ၏ဖုန်း | |
| 1. သုံးစွဲသူအမည်တစ်ခုခုကို သင် ရှာဖွေလိုက်သည်။ | ||
| 2. ထိုသုံးစွဲသူအမည်သို့ သင် မက်ဆေ့ချ်တစ်စောင် ပေးပို့လိုက်သည်။ တစ်ဖက်လူက မက်ဆေ့ချ်ပို့ရန် တောင်းဆိုမှုကို တွေ့မြင်ရသည်။ |
||
| 3. သင်၏မက်ဆေ့ချ်ပို့ရန် တောင်းဆိုမှုကို သူ လက်ခံလိုက်သည်။ ယခုအခါ သုံးစွဲသူအမည်အစား သူ၏ ပရိုဖိုင်း အမည်နှင့် ဓာတ်ပုံကို တွေ့မြင်ရပါပြီ။ |
||
| 4. မက်ဆေ့ချ်တစ်စောင်ကို သူ ရေးသားနေသောအခါ (ထိုအတွက် ဆက်တင်ကို နှစ်ယောက်စလုံး ဖွင့်ထားပါက) စာရိုက်နေကြောင်း အချက်ပြမှုကို သင်တွေ့မြင်ရပါမည်။ | ||
| 5. ယခုအခါ ပရိုဖိုင်း အမည်ကို ဖော်ပြထားသည့် ပုံမှန် Signal ချက်(တ်)တစ်ခုကို တွေ့မြင်ရပါမည်။ |
လူတစ်ဦးထံသို့ မက်ဆေ့ချ်ပို့ရန် တောင်းဆိုမှုကို သူ၏ သုံးစွဲသူအမည်မှတစ်ဆင့် သင် ပေးပို့ပါမည်။ သူက သင်၏တောင်းဆိုမှုကို လက်ခံရန်၊ ဖျက်ပစ်ရန် သို့မဟုတ် ဘလော့ခ်လုပ်ရန် ရွေးချယ်နိုင်ပါသည်။ သင့်တောင်းဆိုမှုကို သူ လက်ခံပြီးသည်နှင့်တစ်ပြိုင်နက် သူ၏ သုံးစွဲသူအမည်အစား ပရိုဖိုင်း အမည်ကို သင် တွေ့မြင်ရပါမည်။ သူသည်လည်း သင့်သုံးစွဲသူအမည်မဟုတ်ဘဲ ပရိုဖိုင်း အမည်ကိုသာ တွေ့မြင်ရပါမည်။
သုံးစွဲသူအမည်မှတစ်ဆင့် သင်တို့ ချိတ်ဆက်ပြီးသောအခါ သူ၏ ပရိုဖိုင်းတွင် သူ၏ သုံးစွဲသူအမည်ကို သင် ထပ်မံတွေ့မြင်ရမည် မဟုတ်ပါ။
အမည်ပြောင်များနှင့် မှတ်ချက်များ
Signal တွင် သင်နှင့်စကားပြောဆိုသူများအတွက် စိတ်ကြိုက်အမည်ပြောင်များကို သိမ်းဆည်းနိုင်သည့်အပြင် ၎င်းတို့နှင့်ပတ်သက်သည့် အရေးကြီးအသေးစိတ်အချက်အလက်များကို သင်မှတ်မိစေရန်အတွက် ၎င်းတို့၏ပရိုဖိုင်တွင် မှတ်ချက် တစ်ခုထည့်နိုင်သည်။
အမည်ပြောင်များနှင့် မှတ်ချက်များကို End-to-End ကုဒ်ဝှက်ထားပြီး သင်သာလျှင် မြင်နိုင်သည်။
အမည်ပြောင်တစ်ခု သတ်မှတ်သောအခါ ကွင်းအတွင်းတွင် တစ်စုံတစ်ယောက်၏ ရွေးချယ်ထားသော အမည်ကို မြင်နိုင်ဦးမည်ဖြစ်သည်။
ဘလော့ခ်လုပ်ခြင်း
ဖုန်းနံပါတ် ကိုယ်ပိုင်အချက်အလက်နှင့်အတူ ဘလော့ခ်လုပ်ခြင်း၏ အလုပ်လုပ်ပုံမှာ ယခုအတိုင်းဖြစ်ပါသည်-
တစ်စုံတစ်ဦးက သင့်ဖုန်းနံပါတ်မှတစ်ဆင့်ဖြစ်စေ သုံးစွဲသူအမည်မှတစ်ဆင့်ဖြစ်စေ သင့်ထံ မက်ဆေ့ချ်ပို့ရန် တောင်းဆိုမှု ပေးပို့ပါက သူ၏ တောင်းဆိုမှုကို သင် ဘလော့ခ်လုပ်နိုင်ပြီး သူ့အနေဖြင့် သုံးစွဲသူအမည် ပြောင်းလိုက်လျှင်ပင် သင့်ထံ ထပ်မံဆက်သွယ်နိုင်မည်မဟုတ်ပါ။
သင်၏ သို့မဟုတ် သူ၏ ဖုန်းနံပါတ် ကိုယ်ပိုင်အချက်အလက်ဆက်တင်ကို မည်သို့ထားရှိသည်ဖြစ်စေ သင့်အနေဖြင့် တစ်ဦးချင်းချက်(တ်) လုပ်ထားသော သို့မဟုတ် အဖွဲ့ချက်(တ်)တွင် အတူပါဝင်သော တစ်စုံတစ်ဦးကို အမြဲဘလော့ခ်လုပ်နိုင်ပါသည်။
Signal တွင် ဘလော့ခ်လုပ်ခြင်း ဟူသည်မှာ သင် ဘလော့ခ်လုပ်လိုက်သူအနေဖြင့် သင့်ဖုန်းနံပါတ်အား မြင်တွေ့ရမှုဆိုင်ရာ ဆက်တင် အပြောင်းအလဲများအပါအဝင် သင်၏ ပရိုဖိုင်းအပ်ဒိတ်မှန်သမျှကို မြင်တွေ့ရခြင်းမရှိတော့ဟု အဓိပ္ပာယ်ရပါသည်။
ဘလော့ခ်ခံထားရသောသူသည် Signal ရှိ သင့်ပရိုဖိုင်းအပ်ဒိတ်မှန်သမျှကို မမြင်တွေ့ရတော့သောကြောင့် တစ်စုံတစ်ဦးကို သင် ဘလော့ခ်လုပ်လိုက်ချိန်တွင် သူသည် သင့်ဖုန်းနံပါတ်ကို မြင်တွေ့နိုင်ပါက သင် ဘလော့ခ်ပြီးနောက်တွင်လည်း သူ့အနေဖြင့် သင့်ဖုန်းနံပါတ်ကို ဆက်၍မြင်တွေ့နေရပါမည်။ ဘလော့ခ်ပြီးနောက်တွင် "ကျွန်ုပ်၏ ဖုန်းနံပါတ်ကို မြင်တွေ့နိုင်သူများ" အား "မည်သူမျှမမြင်နိုင်ပါ" ဟု သတ်မှတ်လိုက်လျှင်လည်း ထိုအတိုင်းဆက်ဖြစ်နေပါမည်။ (၎င်းကိုပြင်ဆင်ရန် သူ့ကို ဘလော့ခ်မလုပ်မီ သင်၏ ဖုန်းနံပါတ် ကိုယ်ပိုင်အချက်အလက်ဆက်တင်ကို ပြောင်းလဲနိုင်ပါသည်။ ဘလော့ခ်ပြီးနောက်တွင် ထိုဆက်တင်ကို သင် ပြောင်းလိုပါက ပြန်ပြောင်းနိုင်ပါသည်။)
စိစစ်အတည်ပြုသည့် ကိရိယာများ
သင် Signal တွင် ချက်(တ်)သောသူများကို စစ်မှန်ကြောင်းစစ်ဆေးရန်အတွက် အထောက်အကူဖြစ်စေမည့် နည်းလမ်းအချို့မှာ ယခုအတိုင်းဖြစ်ပါသည်။ အထူးသဖြင့် တစ်စုံတစ်ဦး၏ မည်သူဖြစ်ကြောင်း အထောက်အထားကို စိစစ်ရန်အတွက် သူ၏ ဖုန်းနံပါတ်ကို သင် မရရှိနိုင်ပါက အဆိုပါနည်းလမ်းများသည် အရေးကြီးပါသည်။ သင်နှင့် စကားပြောနေသူများသည် သူတို့မည်သူဖြစ်သည်ဟု သင် ယုံကြည်ထားသည့်အတိုင်း မှန်ကန်ကြောင်း သေချာစေရန် ထိုကိရိယာများအား အသုံးပြုဖို့ တိုက်တွန်းပါသည်။
တစ်စုံတစ်ဦးနှင့် သင် ပြောဆိုထားသော ချက်(တ်)တစ်ခုချင်းစီတွင် အများနှင့်မတူသည့် ဆက်စပ် လုံခြုံရေးနံပါတ် တစ်ခုရှိပြီး သင်နှင့် သင် စကားပြောနေသည့် တစ်ဖက်လူ နှစ်ဦးစလုံးက ၎င်းကို တွေ့မြင်နိုင်ပါသည်။ လုံခြုံရေးနံပါတ်များ တူညီကြောင်း သေချာစေရန် နှိုင်းယှဉ်ခြင်းသည် သင် ချက်(တ်)နေသောသူ၏ မည်သူဖြစ်ကြောင်းအထောက်အထားကို စိစစ်အတည်ပြုရန် နည်းတစ်နည်း ဖြစ်ပါသည်။
ထိုနံပါတ်များကို နှိုင်းယှဉ်ရန်အတွက် Signal ပြင်ပ ချန်နယ်တစ်ခုကို သင် အသုံးပြုရန် လိုအပ်ပါမည် ၎င်းသည် သင်နှင့်စကားပြောနေသူ မည်သူဖြစ်သည်ဟု သင် ထင်ထားသည့်အတိုင်း စိစစ်အတည်ပြုပေးပါမည် ဥပမာအားဖြင့် တစ်စုံတစ်ဦးက Signal တွင် သင့်ထံ မက်ဆေ့ချ်ပို့လာပြီး သူငယ်ချင်းဟောင်းတစ်ယောက်ပါဟု ဆိုလာပါက ထိုသူငယ်ချင်း၏ အီးမေးလ်လိပ်စာကို သုံးလျက် Signal လုံခြုံရေးနံပါတ်များကို နှိုင်းယှဉ်ခြင်း သို့မဟုတ် လူမှုမီဒီယာပလက်ဖောင်းတွင် သူ့ထံ တိုက်ရိုက်မက်ဆေ့ချ်ပို့ခြင်းဖြင့် ဒုတိယချန်နယ်တစ်ခုတွင် နှိုင်းယှဉ်ရန်အတွက် ထိုသူအနေဖြင့် Signal မဟုတ်သော သူ၏အကောင့်များကို သုံးခွင့်ရှိနေရန် လိုအပ်သောကြောင့် အယောင်ဆောင်သူတစ်ဦးနှင့် သင် စကားပြောနေမိခြင်းမဟုတ်ကြောင်း သေချာစေပါမည်။ လုံခြုံရေးနံပါတ်များကို လူကိုယ်တိုင်တွေ့ခြင်းဖြင့် ဖြစ်စေ၊ အီးမေးလ် သို့မဟုတ် တိုက်ရိုက်မက်ဆေ့ချ်ဖြင့်ဖြစ်စေ၊ ဖုန်း သို့မဟုတ် ဗီဒီယိုကောလ်ဖြင့်ဖြစ်စေ နှိုင်းယှဉ်နိုင်ပါသည်။
ချက်(တ်)တစ်ခု၏ လုံခြုံရေးနံပါတ်ကို ကြည့်ရန် သင့်ချက်(တ်) ထိပ်ဆုံးရှိ တစ်စုံတစ်ဦး၏ ပရိုဖိုင်းကို နှိပ်ပြီး လုံခြုံရေးနံပါတ်ကို ကြည့်ရန် သို့ ရွှေ့သွားပါ။ သင်တို့နှိုင်းယှဉ်နိုင်မည့် နံပါတ်အတွဲတစ်ခု သို့မဟုတ် စကန်ဖတ်၍ရမည့် QR ကုဒ်တစ်ခုကို တွေ့မြင်ရပါမည်။
တစ်စုံတစ်ဦး မည်သူဖြစ်ကြောင်းအထောက်အထားကို အတည်ပြုရန် အက်ပ်အတွင်း သဲလွန်စများလည်း ရှိပါသည်။
တစ်စုံတစ်ဦး၏ ပရိုဖိုင်းကို ကြည့်လိုက်ပါက သင်တို့နှစ်ဦး အတူပါဝင်နေသော အဖွဲ့များ ရှိ၊ မရှိ အလျင်အမြန် တွေ့နိုင်ပါသည်။ ၎င်းသည် မက်ဆေ့ချ်တောင်းဆိုမှုတစ်ခု လက်ခံရရှိသောအခါတွင် အထူးအသုံးဝင်ပါသည်။ သင်တို့နှစ်ဦး အတူပါဝင်သောအဖွဲ့ မရှိပါက လိမ်လည်မှု သို့မဟုတ် လှည့်ဖြားများကို ရှောင်ရှားနိုင်စေရန် လုံခြုံရေးအကြံပြုချက်များသို့ လင့်ခ်ကို တွေ့မြင်ရပါမည်။
လူတစ်ဦး၏ ပရိုဖိုင်း အမည်ဘေးရှိ မြှားကို နှိပ်ခြင်းဖြင့်လည်း ၎င်းနှင့်ပတ်သက်သော နောက်ထပ်အချက်အလက်များကို တွေ့မြင်နိုင်ပါသည်။ ထိုနေရာတွင် သင်တို့နှစ်ဦး အတူပါဝင်သော အဖွဲ့များ ရှိ၊ မရှိ၊ ၎င်းထံသို့ သင် မက်ဆေ့ချ်များ တိုက်ရိုက်ပို့ဖူးခြင်း ရှိ၊ မရှိ၊ ၎င်းသည် Signal အဆက်အသွယ်တစ်ဦး ဟုတ်၊ မဟုတ်၊ သင့်ဖုန်း၏ အဆက်အသွယ်စာရင်းထဲတွင် ၎င်း ပါ၊ မပါ မြင်တွေ့ရပါမည်။ [Signal အဆက်အသွယ်တစ်ဦးသည် သင် ချက်(တ်)စတင်ဖူးသော၊ မက်ဆေ့ချ်ပို့ရန် တောင်းဆိုမှု လက်ခံဖူးသော သို့မဟုတ် သင့်ဖုန်း၏ အဆက်အသွယ်စာရင်းထဲတွင် ဖုန်းနံပါတ်ရှိနေသော တစ်စုံတစ်ဦး ဖြစ်ပါသည်။]
အဖွဲ့ချက်(တ်)တစ်ခုထဲတွင် အဖွဲ့မန်ဘာတစ်ဦးထက်ပို၍ အမည်တူနေပါက ထိုအမည်တူများကို ကြည့်ရှုသုံးသပ်ရန် သင့်အား တိုက်တွန်းချက်တစ်ခုအပြင် Popup အသိပေးချက်တစ်ခုကို တွေ့မြင်ရမည်ဖြစ်ပါသည်။
သုံးသပ်ချက် မျက်နှာပြင်ပေါ်တွင် သင်တို့အနေဖြင့် နောက်ထပ်အဖွဲ့များတွင် အတူပါဝင်နေခြင်း ရှိ၊ မရှိနှင့် အဖွဲ့ဝင်တစ်ဦးဦးသည် ၎င်း၏ ပရိုဖိုင်း အမည်ကို မကြာသေးခင်က ပြောင်းလဲထားခြင်း ရှိ၊ မရှိ တွေ့မြင်နိုင်ပါသည်။
ထိုမျက်နှာပြင်မှနေ၍ အဖွဲ့ အက်ဒ်မင် ထိန်းချုပ်မှုများအပေါ် မူတည်၍ မန်ဘာများကို သင် ဘလော့ခ်လုပ်နိုင်သလို အဖွဲ့ထဲမှ ဖယ်ရှားနိုင်ပါသည်။
ပိုမိုလေ့လာရန်
ပိုမိုလေ့လာရန် ကျွန်ုပ်တို့၏ ဘလော့ဂ်ပို့စ် နှင့် အမေးများသော ထပ်ဆောင်း မေးခွန်းများကို ဖတ်ရှုပါ။